Anak Iban

Palan Bebagi Mayuh Macham Penemu

Ensera Munsang Enggau Gerama

Nyadi leboh baya ke bechakah enggau Gerama Engkabang nya ba tebing sungai dia Munsang endang tak ngunjur kediri nyuntai mending ke leka jako seduai nya ari atas dan kayu semak nya laban ke takut nurun ngerara seduai bai ati ti nangi enggai ke tak disumpit Baya ngapa laban gamal Baya tak naka iya pemanggah lalu nadai tentu milih orang ka alai iya beambi olih maia nya. Munsang endang enda berani engkeretik lalu tubuh iya dibalut iya enggau daun kayu enggai ke seduai tepeda ke iya ke mending ke seduai bechakah.

Leboh Baya nya nyau kira ke udah jauh enselur ke ili sungai nya baru Munsang tu berani mansut kediri begadai gadai laban ke agi takut ke Baya. Gerama Engkabang pan baka nya ga lalu mansut kediri nyau gisai gisai ngusok leka mata iya ke nyau abis empeleman laban keresik ke teperanchit laban sipat iko Baya nya tadi ke ngeransi. Serta Gerama Engkabang nyau udah lantang asai seput dia iya lalu tekenyit ninga bisi orang nyapa iya ari atas dan kayu ba atas tebing ke alai iya bediri nya.. Lalu engkadah Gerama Engkabang ngagai atas dan kayu dia iya lalu meda Munsang ke benong getar getar laban ke agi takut.

“Lapa mua nuan tak ngeyai nya ringat peda aku aya Takey,” pia ko Munsang nanya.

“Eh, nya meh bedau kala umor aku tu ngelaban orang ke pengabis jai adat enggau basa enggau kitai jelu ba baroh dunya tu, gamal aja ke besai tang nadai guna serta ukai utai ke kaban. Baru udah badu bechakah ngelaban Baya aku tadi. Iya ngeransi ninga aku ke ngumbai iya jai adat serta beridup makai jelu bukai serta betangkap enggau bebunoh ke anak mensia. Ketegal nya iya pan lalu nyumpah kami bansa Gerama sigi dibunoh serta diempa bansa Ringin.” Pia ko Gerama Engkabang nyaut enggau sabak sabak laban pa pemedis ati iya ke Baya.

Lama Munsang enda bemunyi laban iya sigi endang udah ninga leka jako Gerama Engkabang enggau Baya ke bechakah tadi. Munsang pan lalu nanya Gerama Engkabang.

“Au kita bansa Gerama, ka pan enda munyi ke nundi ga aku tu aya Takey. Nama batang utai ke diempa kita kena ngidup kediri ngelama tu deh ?” pia ko Munsang.

“Kami bansa Gerama laban ke enda bumai serta nadai betanam ke utai ba tanah lalu enda ga nemu nyelam dalam ai baka jelu bukai tak semina beridup makai buah ke laboh ninggang ai serta bejeput ke utai ba sebelah tanah, tang kami enda beridup ba orang bukai laban kami nemu pengawa ke baka nya enda manah serta ngasoh kitai tulah lalu enda dikerindu ke semua orang,” pia ko Gerama Engkabang nyaut Munsang.
“Nya meh bansa sida Baya nya endang bepakai ke Manok, betangkap ka Ukoi, Chapi enggau Babi ke endang di tupi anak mensia.” pia ga ko Gerama nampong jako iya baru ngagai Munsang.

“Bala Babi , Chapi , Ukoi enggau Manok anak mensia ga semampai bendar bemain ba sebelah tebing sungai jauh ngejang ke rumah anak mensia ke nupi sida, laban ke enda di gaga ka pagar tauka di simpan bala anak mensia dalanm pagar semak rumah sida. Kami enda ngutok bala Baya ke betangkap ke utai ti di tupi anak mensia, kena bejera ke sida ke ngelusu begaga ke pagar alai nyimpan jelu tupi sida. “ pia ko Munsang nimbal jako Gerama Engkabang nya tadi.
“Aku tu laban ke manchal, ka bendar ngemba bala Manok anak mensia leboh ke ngair kelalu jauh ngejang ke rumah orang ke nupi sida,” pia ko Munsang baru
“Kati enda tetengok ga nuan meda Manok anak mensia ke semampai di peda nuan nya Unggal,” pia ko Gerama Engkabang nanya Munsang sambil ke nundi iya.

Lama Munsang enda bemunyi nyaut tanya Gerama Engkabang nya, tak semina enterakan aja iya lalu malik ke bukai laban iya ngasai kediri ke selalu betangkap serta bepakai ke Manok ke di tupi anak mensia neglama tu. Ukai semina Manok ke ngair bemain ba tanah aja ke ditangkap Munsang tang bala sida ke nguba kediri tindok ba sebelah dan kayu pan abis ga ditangkap lalu diempa Munsang. Tak berasai malu Munsang ninga jako tanya Gerama Engkabang nya tadi. Iya lalu kasak kasak ngaga diri baka ke bisi utai ka di seguai ka.

“Eh! ka mupok aku tu aya Takey, nuan bejimat ke bemain ba sebelah selepak batu nya laban enggai ke nuan lagi kena rejang anak mensia enggau gansai leboh sida tepeda ke leka mata nuan ke nyau meingil ingil baka leka marik nya kumbai sida leka pelaga ngapa. Aku tu ka kin, ka ngiga buah sibau mansau enti bisi,” pia ko Munsang enchabar diri ke selalu betangkap ke Manok anak mensia

Munsang pan lalu belanda landa ngejang kediri ninggal ke Gerama Engkabang laban enggai ke Gerama Engkabang maioh agi utai tanya lalu ngemalu ke iya ngapa. Gerama Engkabang pan baka nya ga lalu nama kediri baru ba selepak batu ba baruh ungkap din laban nangi kediri ulih peda lalu dibunoh orang bukai ngapa leboh iya ke enda ngadang laban ke ka bendar tindok enda nemu orang datai.

Ensera tu diambi ari: http://enseraenggaucheritaiban.blogspot.my

Facebook Comments

Related Post

Leave a Reply

Your email address will not be published. Required fields are marked *

Anak Iban © 2017 Frontier Theme