Anak Iban

Palan Bebagi Mayuh Macham Penemu

Ensera Pemintar Pelanduk

Nyadi leboh Sawa ke benong nelan Remaung Raras serta leboh maia Pelandok ke ngajat ba atas perutSawa lalu numbit perut Sawa nya tadi dia Munsang endang tak enda engkebut serta engkeretik ngemata ke pengawa sida tiga ari atas dan kayu ke ngimbai nya. Mata Munsang tak semina besap besap ngapa lalu seput iya pan nyau jarang baka ke ka luput meda pengawa sida tiga Sawa, Pelandok enggau Remaung Raras ke bepakai ke pangan diri. Tubuh Munsang maia nya nyau chelap angat pa penakut iya nangi enggai kediri dipeda Remaung Raras enggai ke tak digagai lalu ditangkap ke empa iya ngapa.

Iya meh nyau udah bekejang Pelandok ninggal ka endor nya tadi, nya baru Munsang ngemerani kediri nurun ari dan kayu nya. Mansang begadai gadai kenu ko gamal Munsang nya tadi laban nangi nyangka Sawa nya tak enda mati tauka semina luput aja meda sengkilong Sawa nya ke nyau berapoh. Lama agi mansang ke semak agi ga Munsang ka ngagai tudah Sawa ke nyau bejor bejor ba lebak nya tadi. Udah meh Munsang nyau nemu Sawa nya amat udah mati dia iya lalu nilik tubuh Sawa ke mati nya laban ka nemu nama utai ke munoh iya.

Munsang pan enda nyangka lalu tekenyit bendar ati meda gaya utai ke tau ngasoh Sawa nya mati dibunoh Pelandok. Lalu peresa iya bekau abi ke benong bedarah nya ba perut Sawa.

“Apu , amat balat ga gaya perut Sawa tu tadi alai Pelandok nya mantai ke bungai ngajat “Chekak Pua Lanchau Chibai,”. Tak nyau bumbus perut Sawa ditumbit kaki Pelandok ke ngemit nya . Enda disangka sangka kaki bengat ngering nya utai gamal ke nyau baka ulu lunga peraut,” pia ko Munsang bejako kediri.

Leboh ke meresa abi tumbit Pelandok nya dia Munsang tepeda ke empat iti lubang ke mit bendar tang meh chukup dalam. Dini enda nyau nyentok ngagai lempuang Sawa tumbit Pelandok nya tadi.

“Amat pintar serta landik ga Pelandok tu tadi nipu lalu munoh Remaung Raras seduai Sawa, enti enda pia tak nadai berampang tuboh Pelandok nya diempa seduai iya. Ke tinga deh tau dikumbai enda chukup tubuh Pelandok nya tadi,” pia ko Munsang ga alit ati.

“Enti nitih ke pemesai gamal enggau pengering, dini Pelandok tu tadi tan jamah Remaung Raras seduai Sawa nya tadi. Nya meh kitai anang meda gamal orang nya mit, tauka gamal orang nya baka ke jai pendiau anang lalu ngumbai orang nya enda kering tauka pintar ngidup kediri. Laban sida iya tau ngalah ke orang ke besai ke selalu ngumbai diri empu menyana serta kering tang nadai pemintar ngidup kediri ba dunya tu, amat enggai nyadi kitai selalu belandik ke pengering tauka gagah enti nadai pemintar” pia ko Munsang bejako kediri baru.

 

Ensera tu diambi ari: http://enseraenggaucheritaiban.blogspot.my/2009/09/pemintar-pelandok.html

Facebook Comments

Related Post

Leave a Reply

Your email address will not be published. Required fields are marked *

Anak Iban © 2017 Frontier Theme