JAKU SEMPAMA IBAN 2

NO

JAKU SEMPAMA

RETI IYA

1 Ikak lelangak ikan enda ngaban, kudi memuri hari enda ujan Ngembuan pengingin ati ngagai orang tang orang nya enggaika iya
2 Ngarapka kijang dalam babas Ngarapka utai ke bedau temu ulih tauka enda.
3 Rusa di kaki tangga enda diemparu, kunchit di tisi langit deka ditunu. Utai ke semak udah temu ulih enda diambi tang utai ke jauh sereta bedau temu ulih tauka enda deka digiga
4 Pandak mulut engkerasak, panjai mulut kitai Orang ke deka bendar betenah tauka bejai orang bukai
5 Baka pipit ke deka nelan buah embawang Baka orang ke deka ngereja pengawa ke enda ulih ditapi tauka ditangkup iya.
6 Untung bulih beliung enda ngambuh, mudah bulih peredah enda ningkuh Bulih utai tang nadai pengiruh tauka pemedis ngulihka iya. Bulih utai enggau mudah
7 Baka langkau enda ngipakka dampa, baka lalau enda ngipakka tangga Pengawa ke dikereja enda ngipakka langkar tubuh
8 Anang guai manjung di pala wung Anang guai gaga enti utai ke dikereja tauka dikinginka bedau temu ulih
9 Nibarka jala enda betating Mansutka jaku enda berunding dulu
10 Ngasaka nyawa langau Ngasaka diri aja, ngumbai indu dara dekaka iya
11 Baka buyah ke nabak diri ke api Ngereja pengawa ke ngemedis diri
12 Sapa ke makai chabi nya meh berasai pedas Orang ke ngereja penyalah nya meh ngasaika penyalah diri
13 Orang di ili munsi tubu, orang di ulu balut miang Orang rumah bukai ke bisi penusah tang kitai serumah ke enggau kiruh
14 Ragak riang, enti dipansuh enda bulih seputung munti Balat seregah tang penemu ke dikembuan enda tetipakka sereg
15 Labang apai labang ga  anak. Enti apai indai enda manah ulah, anak pan murihka penyai apai iya
16 Baka kepayang ngadaka dilah Nyebut aja tang enda ngereja
17 Besai periuk besai ga kerak, besai beliung besai ga abak. Orang ke begaji besai mayuh ga belanja iya
18 Lawa kerubung enda perisi. Balat seregah tang kurang penemu tauka belanja dikembuan
19 Bisi niki nibung, bisi niki pinang Bechiping adat
20 Duruk bubut enggau ruai Beduruk tauka ngereja pengawa ke enda setipak enggau enggi pangan diri.
21 Bubut tau ruai enda Dua iku orang ngereja pengawa ke bebida pemanah
22 Mansai sungai ngena tapa, nebang tapang ngena lungga Deka ngereja pengawa ke temu enda ulih tangkup
NO JAKU SEMPAMA RETI IYA
23 Remaung di rumah, raung di tanah Di rumah kering, regas tang enti gawa di tanah nadai tapi
24 Batu tungku pan tau besengki Diri menyadi pan tau belaya
25 Baka pitak ke dibuai mata Nadai temu tunga, nadai temu tuju.
26 Baka ukui deka beranak Kasak-kasak, enda jenuh pendiau
27 Baka mayau enggau ukui Enda tau begulai, selalu belaya
28 Baka keli ditetak iku. Enda entap burit, selalu kundang kuit bejalai kin kitu
29 Lansar tau nyadi lubuk, lubuk tau nyadi lansar Orang ke mensekin sereta tusah pendiau tau nyadi kaya sereta lantang lalu orang ke udah kaya sereta nyamai diau tau nyadi mensekin papa
30 Manuk lepas jari bau tai. Udah bulih peluang enda dikena, udah peluang nya lepas baru nesal
31 Baka timau jampat medah Enda liat ngereja pengawa, jampat leju
32 Bekikis bulu betis bebuai bulu gundai Beambis belanja enggau reta tengkira dikena nyengulaka bala anak
33 Baka perau ke patah kemudi. Pengawa ke dikereja nadai pemujur laban nadai orang ke nemu ulih ngiring kitai
34 Baka mumban ke teruju ai Baka pendiau ke enda tentu tegap tang enda ga tak kelalu merinsa
35 Untung sekarung rugi seguni Amu deka bulih untung mayuh tang tulihka pengerugi
36 Baka pinang dibelah dua Sama sigat, sama bajik.
37 Buah rian enda tau begulai enggau buah rampu. Bujang enggau dara enda tau begulai laban ngembuan pengingin ati ke pangan diri.
38 Ngarapka pagar, pagar ga makai padi Orang ke dikarapka nyaga pengelikun utai enggau manah tang iya empu ke ngereja penyalah
39 Gerah mata undang Gaya dipeda mudah diulihka tang lebuh dikereja tusah bendar.
40 Runggu ensing enti terebai apus ga sungai Gamal dipeda lembau tang enti iya ngereja pengawa tembu enggau manah
41 Ketup lelabi mati Kereja bebendar nyentukka utai ke dijuluk ati nya ulih, enda dilengkaka ngapa
42 Baka tekura enggai enda tepantup di bandir Ngereja pengawa nitihka pengelaju diri empu asal meh tembu
43 Ari bebini ari betutus, abi gerai bini mati Maya nya nguna utai tekalanya deka  ngereja iya, udah iya ulih utai nya nadai diguna agi.
44 Enda ulih dirika tali basah, enda ulih dudukka mangkuk belah. Lebuh bechara, enda ulih diasuh menang meh orang ke tanah salah
45 Ukai ngajihka rangkang ngachuk mata Ukai dekaka penusah nuntung sapa-sapa
46 Udah labuh dipanggung lesung Beturut-turut ditinggang penusah
NO JAKU SEMPAMA RETI IYA
47 Buah ilang ilu diempa parai apai dilua parai indai Pengawa ke balat nadai ngena, dikereja ngenusah enda digaga pan ngemediska kitai mega
48 Baka mayau ke ngelamun tai. Orang ke ngelalaika penyai tauka penyalah diri
49 Raung ke beketebung pama bengkak jari, tichak ke beranak engkarung beadi-adi. Orang ke ngereja pengawa tang kitai ke napi pemedis enggau pengiriuh
50 Mang ari kepayang rendam sepagi, munuh ari ipuh ujung jenggi, nyaing ari puting mata geraji. Orang ke ngembuan penemu, pemerani tauka pengering ke jauh lebih nyulut ari orang bukai
51 Muntang ari Limbang semalam rantu jalai, melit ari Kanowit jampat datai Deka ngereja pengawa enggau  chara muntang tauka beguai tang ngasuh laun agi tembu
52 Buntak pulai buntak. Pulai puku, nadai alah nadai menang.
53 Baka ukui engkadah linau Ngining pengaya enggau pengeraja orang
54 Buah empelam buah empelit, masam di dalam manis di kulit Gamal tauka gaya manah dipeda tang ati iya jai enggau orang
55 Labah baka buah merunjau ili, Puntan baka menasan jalai jani Ngereja pengawa tang nadai pengujung, puntan, nadai nyadi sereta lebu ngapa.
56 Rarika rebut tetemuka ujan, rarika sungkup tetemukan pendam Nadai ulih nyeliahka diri ari besatup enggau penusah
57 Rari kulu tama buba, rari kili tama ensenga Penusah nadai ulih diseliahka, kin kia dituntung penusah
58 Baka sawa ti natka telan Gali gadak-gadak natka pengenyang perut udah badu makai
59 Agi bau lia Agi biak, bedau aruh ngemujang tauka ngenaraka diri.
60 Laju ari peluru leka senapang, lasit ari sumpit rejang pematang Orang ke ngembuan pemereti, pemerani enggau pengering ke jauh lebih agi ari orang bukai
61 Agi bekulit agi bedaki Asal kitai rajin bekereja kitai agi bulih utai.
62 Betunggang lupung Beambis-ambis duit ringgit enggau reta tengkira dikena nyengulaka bala anak.
63 Ngetu baka puyu mabuk keruh, ngenung baka empelekung mabuk ambuh Temati kutu, enda nemu nama bagi utai ke patut dikereja tekala nya
64 Sumpah empitu enggau chuik. Sebarang sapa ke dulu ngelanggar danji iya nya meh dulu kena tinggang penusah.
65 Baka kemarau munsang. Lebuh siang mata deka tinduk tang lebuh malam mata enggai ngantuk
66 Baka tapang diwan rembia, baka lubuk diwan baya Indu dara tauka orang bujang ke udah bisi orang ngempu
67 Udah aruk dipukung alung Udah ga jai gamal tambah enggau penyai ulah
68 Baka empeliau bedua iku Gawa ke orang bukai rajin tang gawa ke diri empu lembau
69 Makai pala bangah Rajin gawa ke orang tang lembau ngereja pengawa diri
70 Kapal pechah yu kenyang Kitai ke kiruh ngereja pengawa tang orang bukai ke bempu penguntung
NO JAKU SEMPAMA RETI IYA
71 Ngarapka bubu pesuk. Ngarapka pengawa ke dikereja meri penguntung tang nadai ngenataika asil.
72 Bepantuk diri sekerungan Jadi melaki bini enggau diri serumah.
73 Baka asam gulai garam Orang ke tau begulai, enda belaya.
74 Munyi burung ke makai buah kara Richah, ragak, inggar
75 Merau sama tau, naik sama landik Sama nemu sereta landik ngereja pengawa
76 Kair pantuk. Utai ke ulih sari semina chukup diempa sari nya aja.
77 Nanam tubai langkung Deka digumak, deka dilangkung
78 Betumbuk dan kandis Siku lelaki enggau siku indu diri menyadi ari sepiak jadi enggau siku indu siku lelaki diri menyadi ari sepiak mega.
79 Turun mata benih Dua iku lelaki diri menyadi jadi enggau dua iku indu diri menyadi ari sepiak mega.
80 Kurus keretum Jarang nani, nguan tauka tinduk ba peninduk diri
81 Kemaya ingkat kala ke laut Nadai utai dikenau, nadai pengelandik laban enda kala ngereja
82 Apin kijang merauk apin ga rangkang patah Apin kitai datai ba endur orang ke digusung apin ga utai nyadi dia.
83 Ati hari. Jampat berubah ati, sekejap manah udah nya lalu bebali jai
84 Abis di tanah abis di rumah Bumai tang enda bulih padi, penyuntuk nadai padi
85 Antu berumah baruh dagu Jaku tauka penemu ke dipansuka kitai enda bejimat tauka ukai ari pansik dulu tau mai penusah ngagai kitai ke mansutka iya
86 Amau di puchuk tuga Enda tegap, enda entap.
87 Au belau. Mulut ngau tauka nyanggup ngapa tang tulang enda ngereja
88 Anak nganti indai pulai turun Nganti enggau ati ke lelengau, sinu sereta merampau
89 Aum juak Dua mua tauka dua ati lalu bulih penguntung ari sepiak-sepiak
90 Angat tai manuk. Rajin sekejap aja lalu jampat mantul tauka leju ngereja pengawa
91 Aruk-aruk burit kali, pagila lusa dudi hari. Deka malas uti, tundi, keduan, laya sebarang maya dudi hari.
92 Asai ke diau di baruh punggu Selalu ngembuan pengirau ati enggaika ditinggang penusah tauka pemedis
93 Apin burung terebai, apin ga rangkang patah Maya nya kitai datai tauka pulai ari rumah orang tekala nya ga penusah nyadi dia
94 Arapka bubu pesuk Ngarap ngapa tang utai ke dikarapka nya enda ulih.
NO JAKU SEMPAMA RETI IYA
95 Anchah gagaka periuk tanah Kelalu begaut madahka pengaga ati diri tang nya tau ngujungka  bulih penusah sereta asa ngapa
96 Asai ke megai telu Ngembuan pengerawan tauka penakut enggaika bulih penusah
97 Asap lia seduai endang segulai Nasit seduai kedeka jadi melaki bini endang udah serasi
98 Belah rutan Enda talahka pangan laban sama-sama kering, gagah sereta berani
99 Buah ilang ilu, diempa parai indai enda diempa parai apai Penusah tauka penyalah ke edna ulih diseliahka. Dikereja salah enda dikereja pan salah mega.
100 Buyah ngereja api, manuk ngereja taji Ngembuan ati ke sengaja deka ngereja pengawa ke tau ngemedis tauka ngenusah diri.
101 Berani nebang berani nyan. Ati sengaja deka ngereja utai lalu enti bisi penusah tauka penyalah  iya patut berani mega tanggung
102 Bingkuk batang  empasa, lurus ulu lungga Enda tentu lurus ati lalu enda mega kelalu jai
103 Baka pendiau antu bubut Diau nyembuah kediri, enda betampung rumah enggau orang.
104 Berumahka ati orang Nyerangkung ati enggau penemu orang bukai ari belakang. Melakangka orang ke nadai datai lebuh mutuska penemu
105 Baka ke meda balak mentua. Nemu tauka meda utai nya salah tang enggai nyadi ngerara laban takutka utai nya ngenusah tauka ngemedis diri.
106 Batang enda telanggarka tuga Anak enda telabanka apai indai, nembiak enda telabanka pengajar, orang biak enda telabanka orang tuai, orang tampil enda telabanka orang asal.
107 Baka Beketan Udah diberi orang makai lalu angkat beguai-guai tauka berumban angkat
108 Belakang bingkuk diasuh ngema pintu, lengan singkung diasuh nyan  alu. Orang ke nadai tauka kurang penemu diasuh tauka dipaduka mangku pengawa.
109 Baka baya ke ditegah indu Abis ati, abis runding sereta nadai temu tunga laban ti kelalu kesal.
110 Baka manang ke nangkap semengat. Beguai, jampat, lanchat, sikar
111 Baka ke ngelakuka tajau belah Mar deka belaki bebini.
112 Buruk jerami Anak itik mati buruk burit laban mechah maya buruk jerami udah badu ngetau
113 Baka rutan tampung danan, Baka ijuk tampung penduk, Baka wi tampung tali. Parai orang ke tuai lalu ditampung orang ke rebak dudi.
114 Begantung randu. Dikena madahka perut diri lapar
115 Begantung senduk Maya lapar pungkang, nadai padi, nadai beras
116 Baka batu tungku. Nelap sereta nadai mayuh jaku
NO JAKU SEMPAMA RETI IYA
117 Baka mulung, peneka ati ngaga,dilinut tau, ditumpi tau. Peneka ati ngasuh, peneka ati ngaga sereta nadai muai jaku orang
118 Baka telu ba tapa, enti dipichit tentu belah Di baruh kuasa orang, sebarang maya orang tau nganu tauka ngemedis kitai
119 Baru ngiku pipit. Dikena madahka penumbuh padi, daun iya baru nyumbuk ngiku pipit
120 Baru betentang dan Dikena madahka penumbuh padi ke baru tengan mansang
121 Baru ngijap bubu Padi baru ngandung.
122 Baru entachau Padi ngabas murai
123 Baru tau dipangka labu Padi baru deka mansau.
124 Baka engkudu mayuh mata Mayuh orang dikedeka tauka dikingin ati
125 Bengkak jari. Bepentika bini ke benung ngandung lalu enda tau peneka ati ngaga sebarang utai enggaika anak ada menawa
126 Munyi ke di sampu Gut-gut nganu urang enda nemu badu
127 Muka kelambi nyaganka kurap Mantai ka penyai/penyalah/pemalu diri empu
128 Mapa ke rau Bam bendar. baka ke enda kala makai
129 Mabuk nadai ditumi, ngabang enda diambi Nadai tentu tuju ngereja siti-siti pengawa. kiruh bendar tang nadai asil
130 Kembai tali Ai ka bisi mansang mimit. Bah ti enda kelalu besai
131 Idung antara mata, dilah antara nyawa Penemu tengah-tengah. Nadai nanah ka sapa-sapa
132 Bula enggai jaku ti madah ke diri enggai tang dalam ati, deka
133 Buai batu enda ingat ke pangan agi
134 Beseling kain Nadai penemu ba senentang siti-siti pekara.
135 Berani Kesa Enda tentu nyengala berani
136 Berani Babi Berani enggau nadai akal. ‘hentam’ aja
137 Belah Pauh Empa pengelebat ari ujan
138 Bekerendut dada meda aja tang nadai ati deka nulung
139 Baka Kilat ngelambai petang jampat amat ngereja utai
140 Asai ke enda ngindik tanah rari empa penakut iya. enda berasai singkang kaki, nyau ka tesipak ke urat kayu.
141 Asai ke dibuai empeleman berasai nyamai bendar, nadai pedis agi.
142 Menyadi perut jani, kaban perut ikan urang ke deka bekaban lebuh maia kitai senang ajak. Enti udah maia di tuntung penusah, nadai ia ibuh agi
143 Rari ke ribut tetemu ke ujan, rari ke sungkup tetemu ke pendam nya utai ti di kenggai, nya ga utai ti datai(nyadi)
144 Telan sawa enda terpanggai, tangkap kamba nadai endor mulai Orang ke bisi berasai malu nerima tolong ari orang leboh iya bisi penusah laban iya ingat ka diri empu jarang serta enda kala meri tolong ngagai orang bukai.
NO JAKU SEMPAMA RETI IYA
145 Tuai Pala Upa disema ke kitai ngaggai siku-suku tuai ke kelalu lembut tauka nadai penamu serta enda patut mangku pengawa tuai
146 Besai Tai laut Besai tuboh tang kurang pengering ngerja pengawa
Facebook Comments

Leave a Reply

Your email address will not be published. Required fields are marked *