JAKU SEMPAMA IBAN

Jaku Sempama Reti Iya
Anang guai manjung di pala wung Anang guai gaga enti utai ke dikereja tauka dikinginka bedau temu ulih
Ari bebini ari betutus, abi gerai bini mati Maya nya nguna utai tekalanya deka  ngereja iya, udah iya ulih utai nya nadai diguna agi.
Agi bau lia Agi biak, bedau aruh ngemujang tauka ngenaraka diri.
Agi bekulit agi bedaki Asal kitai rajin bekereja kitai agi bulih utai.
Asai ke enda ngindik tanah rari empa penakut iya. enda berasai singkang kaki, nyau ka tesipak ke urat kayu.
Asai ke dibuai empeleman berasai nyamai bendar, nadai pedis agi.
Anchah gagaka periuk tanah Kelalu begaut madahka pengaga ati diri tang nya tau ngujungka  bulih penusah sereta asa ngapa
Asai ke megai telu Ngembuan pengerawan tauka penakut enggaika bulih penusah
Asap lia seduai endang segulai Nasit seduai kedeka jadi melaki bini endang udah serasi
Apin burung terebai, apin ga rangkang patah Maya nya kitai datai tauka pulai ari rumah orang tekala nya ga penusah nyadi dia
Arapka bubu pesuk Ngarap ngapa tang utai ke dikarapka nya enda ulih.
Apin kijang merauk apin ga rangkang patah Apin kitai datai ba endur orang ke digusung apin ga utai nyadi dia.
Ati hari. Jampat berubah ati, sekejap manah udah nya lalu bebali jai
Abis di tanah abis di rumah Bumai tang enda bulih padi, penyuntuk nadai padi
Antu berumah baruh dagu Jaku tauka penemu ke dipansuka kitai enda bejimat tauka ukai ari pansik dulu tau mai penusah ngagai kitai ke mansutka iya
Amau di puchuk tuga Enda tegap, enda entap.
Au belau. Mulut ngau tauka nyanggup ngapa tang tulang enda ngereja
Anak nganti indai pulai turun Nganti enggau ati ke lelengau, sinu sereta merampau
Aum juak Dua mua tauka dua ati lalu bulih penguntung ari sepiak-sepiak
Angat tai manuk. Rajin sekejap aja lalu jampat mantul tauka leju ngereja pengawa
Aruk-aruk burit kali, pagila lusa dudi hari. Deka malas uti, tundi, keduan, laya sebarang maya dudi hari.
Asai ke diau di baruh punggu Selalu ngembuan pengirau ati enggaika ditinggang penusah tauka pemedis
Alah nyadi abu, menang nyadi arang Belaya nadai ngenatai ka penguntong
Apai Sali belabung jalung  
Baka pipit ke deka nelan buah embawang Baka orang ke deka ngereja pengawa ke enda ulih ditapi tauka ditangkup iya.
Baka langkau enda ngipakka dampa, baka lalau enda ngipakka tangga Pengawa ke dikereja enda ngipakka langkar tubuh
Baka buyah ke nabak diri ke api Ngereja pengawa ke ngemedis diri
Baka kepayang ngadaka dilah Nyebut aja tang enda ngereja
Besai periuk besai ga kerak, besai beliung besai ga abak. Orang ke begaji besai mayuh ga belanja iya
Bisi niki nibung, bisi niki pinang Bechiping adat
Bubut tau ruai enda Dua iku orang ngereja pengawa ke bebida pemanah
Batu tungku pan tau besengki Diri menyadi pan tau belaya
Baka pitak ke dibuai mata Nadai temu tunga, nadai temu tuju.
Baka ukui deka beranak Kasak-kasak, enda jenuh pendiau
Baka mayau enggau ukui Enda tau begulai, selalu belaya
Baka keli ditetak iku. Enda entap burit, selalu kundang kuit bejalai kin kitu
Baka timau jampat medah Enda liat ngereja pengawa, jampat leju
Bekikis bulu betis bebuai bulu gundai Beambis belanja enggau reta tengkira dikena nyengulaka bala anak
Baka perau ke patah kemudi. Pengawa ke dikereja nadai pemujur laban nadai orang ke nemu ulih ngiring kitai
Baka mumban ke teruju ai Baka pendiau ke enda tentu tegap tang enda ga tak kelalu merinsa
Baka pinang dibelah dua Sama sigat, sama bajik.
Buah rian enda tau begulai enggau buah rampu.   Bujang enggau dara enda tau begulai laban ngembuan pengingin ati ke pangan diri.
Baka tekura enggai enda tepantup di bandir Ngereja pengawa nitihka pengelaju diri empu asal meh tembu
Buah ilang ilu diempa parai apai dilua parai indai Pengawa ke balat nadai ngena, dikereja ngenusah enda digaga pan ngemediska kitai mega
Baka mayau ke ngelamun tai. Orang ke ngelalaika penyai tauka penyalah diri
Buntak pulai buntak. Pulai puku, nadai alah nadai menang.
Baka ukui engkadah linau Ngining pengaya enggau pengeraja orang
Buah empelam buah empelit, masam di dalam manis di kulit Gamal tauka gaya manah dipeda tang ati iya jai enggau orang
Baka sawa ti natka telan Gali gadak-gadak natka pengenyang perut udah badu makai
Betunggang lupung Beambis-ambis duit ringgit enggau reta tengkira dikena nyengulaka bala anak.
Baka kemarau munsang. Lebuh siang mata deka tinduk tang lebuh malam mata enggai ngantuk
Baka tapang diwan rembia, baka lubuk diwan baya Indu dara tauka orang bujang ke udah bisi orang ngempu
Baka empeliau bedua iku Gawa ke orang bukai rajin tang gawa ke diri empu lembau
Bepantuk diri sekerungan Jadi melaki bini enggau diri serumah.
Baka asam gulai garam Orang ke tau begulai, enda belaya.
Betumbuk dan kandis Siku lelaki enggau siku indu diri menyadi ari sepiak jadi enggau siku indu siku lelaki diri menyadi ari sepiak mega.
Belah rutan Enda talahka pangan laban sama-sama kering, gagah sereta berani
Buah ilang ilu, diempa parai indai enda diempa parai apai Penusah tauka penyalah ke edna ulih diseliahka. Dikereja salah enda dikereja pan salah mega.
Buyah ngereja api, manuk ngereja taji Ngembuan ati ke sengaja deka ngereja pengawa ke tau ngemedis tauka ngenusah diri.
Berani nebang berani nyan. Ati sengaja deka ngereja utai lalu enti bisi penusah tauka penyalah  iya patut berani mega tanggung
Bingkuk batang  empasa, lurus ulu lungga Enda tentu lurus ati lalu enda mega kelalu jai
Baka pendiau antu bubut Diau nyembuah kediri, enda betampung rumah enggau orang.
Berumahka ati orang Nyerangkung ati enggau penemu orang bukai ari belakang. Melakangka orang ke nadai datai lebuh mutuska penemu
Baka ke meda balak mentua. Nemu tauka meda utai nya salah tang enggai nyadi ngerara laban takutka utai nya ngenusah tauka ngemedis diri.
Batang enda telanggarka tuga Anak enda telabanka apai indai, nembiak enda telabanka pengajar, orang biak enda telabanka orang tuai, orang tampil enda telabanka orang asal.
Baka Beketan Udah diberi orang makai lalu angkat beguai-guai tauka berumban angkat
Belakang bingkuk diasuh ngema pintu, lengan singkung diasuh nyan  alu. Orang ke nadai tauka kurang penemu diasuh tauka dipaduka mangku pengawa.
Baka baya ke ditegah indu Abis ati, abis runding sereta nadai temu tunga laban ti kelalu kesal.
Baka manang ke nangkap semengat. Beguai, jampat, lanchat, sikar
Baka ke ngelakuka tajau belah Mar deka belaki bebini.
Buruk jerami Anak itik mati buruk burit laban mechah maya buruk jerami udah badu ngetau
Baka rutan tampung danan, Baka ijuk tampung penduk, Baka wi tampung tali. Parai orang ke tuai lalu ditampung orang ke rebak dudi.
Begantung randu. Dikena madahka perut diri lapar
Begantung senduk Maya lapar pungkang, nadai padi, nadai beras
Baka batu tungku. Nelap sereta nadai mayuh jaku
Baka mulung, peneka ati ngaga,dilinut tau, ditumpi tau. Peneka ati ngasuh, peneka ati ngaga sereta nadai muai jaku orang
Baka telu ba tapa, enti dipichit tentu belah Di baruh kuasa orang, sebarang maya orang tau nganu tauka ngemedis kitai
Baru ngiku pipit.   Dikena madahka penumbuh padi, daun iya baru nyumbuk ngiku pipit
Baru betentang dan Dikena madahka penumbuh padi ke baru tengan mansang
Baru ngijap bubu Padi baru ngandung.
Baru entachau Padi ngabas murai
Baru tau dipangka labu Padi baru deka mansau.
Baka engkudu mayuh mata Mayuh orang dikedeka tauka dikingin ati
Bengkak jari. Bepentika bini ke benung ngandung lalu enda tau peneka ati ngaga sebarang utai enggaika anak ada menawa
Bula enggai jaku ti madah ke diri enggai tang dalam ati, deka
Buai batu enda ingat ke pangan agi
Beseling kain Nadai penemu ba senentang siti-siti pekara.
Berani Kesa Enda tentu nyengala berani
Berani Babi Berani enggau nadai akal. ‘hentam’ aja
Belah Pauh Empa pengelebat ari ujan
Bekerendut dada meda aja tang nadai ati deka nulung
Baka Kilat ngelambai petang jampat amat ngereja utai
Besai Tai laut Besai tuboh tang kurang pengering ngerja pengawa
Baru ngelangkah sesingkang udah bekalau panjung neratang ka diri menang orang ke sumbung madah ke diri lebih ari orang bukai taja pan utai diulih iya mimit aja lebih ari orang bukai
Banyak tai badak, mayuh tai nyumboh Bala tubuh aja mayuh leboh ngereja utai tang utai ulih enda ngipak ke pemayuh tubuh
Baka kenyulong mabok keroh, baka empalekong mabok amboh Ngetu, tebalengga enda lama
Duruk bubut enggau ruai Beduruk tauka ngereja pengawa ke enda setipak enggau enggi pangan diri.
Ditelan mati indai, di lua mati apai Enda ulih mutus ka runding. Kin sah, kitu pan salah
Deka ka guni, enggai ka beras Deka bebini indu janda tang enggai bempu anak iya
Enda ulih dirika tali basah, enda ulih dudukka mangkuk belah. Lebuh bechara, enda ulih diasuh menang meh orang ke tanah salah
Gerah mata undang Gaya dipeda mudah diulihka tang lebuh dikereja tusah bendar.
Ikak lelangak ikan enda ngaban, kudi memuri hari enda ujan Ngembuan pengingin ati ngagai orang tang orang nya enggaika iya
Idung antara mata, dilah antara nyawa Penemu tengah-tengah. Nadai nanah ka sapa-sapa
Injau Kara Nginjau utai orang tang enda dianjung pulai agi
Ketup lelabi mati Kereja bebendar nyentukka utai ke dijuluk ati nya ulih, enda dilengkaka ngapa
Kapal pechah yu kenyang Kitai ke kiruh ngereja pengawa tang orang bukai ke bempu penguntung
Kair pantuk.   Utai ke ulih sari semina chukup diempa sari nya aja.
Kurus keretum Jarang nani, nguan tauka tinduk ba peninduk diri
Kemaya ingkat kala ke laut Nadai utai dikenau, nadai pengelandik laban enda kala ngereja
Kembai tali Ai ka bisi mansang mimit. Bah ti enda kelalu besai
Kunchit di tisi langit di asu,rusa di kaki tangga enda di emparu Rindu tauka kelalu deka kiruh ngereja pengawa ke enda menuku tauka nadai ngenatai ke penguntung ba menoa ti jauh ,tang pengawa ti menyana tauka utai ti endang udah ditemu nguntung ke diri empu ba endor ti semak ,enggai kiruh ngereja ia
Labang apai labang ga  anak.   Enti apai indai enda manah ulah, anak pan murihka penyai apai iya
Lawa kerubung enda perisi. Balat seregah tang kurang penemu tauka belanja dikembuan
Lansar tau nyadi lubuk, lubuk tau nyadi lansar Orang ke mensekin sereta tusah pendiau tau nyadi kaya sereta lantang lalu orang ke udah kaya sereta nyamai diau tau nyadi mensekin papa
Labah baka buah merunjau ili, Puntan baka menasan jalai jani Ngereja pengawa tang nadai pengujung, puntan, nadai nyadi sereta lebu ngapa.
Laju ari peluru leka senapang, lasit ari sumpit rejang pematang Orang ke ngembuan pemereti, pemerani enggau pengering ke jauh lebih agi ari orang bukai
Mansai sungai ngena tapa, nebang tapang ngena lungga Deka ngereja pengawa ke temu enda ulih tangkup
Manuk lepas jari bau tai.   Udah bulih peluang enda dikena, udah peluang nya lepas baru nesal
Mang ari kepayang rendam sepagi, munuh ari ipuh ujung jenggi, nyaing ari puting mata geraji. Orang ke ngembuan penemu, pemerani tauka pengering ke jauh lebih nyulut ari orang bukai
Muntang ari Limbang semalam rantu jalai, melit ari Kanowit jampat datai Deka ngereja pengawa enggau  chara muntang tauka beguai tang ngasuh laun agi tembu
Makai pala bangah Rajin gawa ke orang tang lembau ngereja pengawa diri
Munyi burung ke makai buah kara Richah, ragak, inggar
Merau sama tau, naik sama landik Sama nemu sereta landik ngereja pengawa
Munyi ke di sampu Gut-gut nganu urang enda nemu badu
Muka kelambi nyaganka kurap Mantai ka penyai/penyalah/pemalu diri empu
Mapa ke rau Bam bendar. baka ke enda kala makai
Mabuk nadai ditumi, ngabang enda diambi Nadai tentu tuju ngereja siti-siti pengawa. kiruh bendar tang nadai asil
Menyadi perut jani, kaban perut ikan urang ke deka bekaban lebuh maia kitai senang ajak. Enti udah maia di tuntung penusah, nadai ia ibuh agi
Mang Tulang Orang ti selalu madah kadiri bisi pemedis/sakit enti leboh bisi pengawa dikerja. Iya ke bendar iya enggai gawa tauka ngelusu
Mang ari kepayang rendam sepagi Bisa jako didinga orang maioh
Ngarapka kijang dalam babas Ngarapka utai ke bedau temu ulih tauka enda.
Nibarka jala enda betating Mansutka jaku enda berunding dulu
Ngasaka nyawa langau Ngasaka diri aja, ngumbai indu dara dekaka iya
Ngarapka pagar, pagar ga makai padi Orang ke dikarapka nyaga pengelikun utai enggau manah tang iya empu ke ngereja penyalah
Ngetu baka puyu mabuk keruh, ngenung baka empelekung mabuk ambuh Temati kutu, enda nemu nama bagi utai ke patut dikereja tekala nya
Ngarapka bubu pesuk. Ngarapka pengawa ke dikereja meri penguntung tang nadai ngenataika asil.
Nanam  tubai langkung Deka digumak, deka dilangkung
Orang di ili munsi tubu, orang di ulu balut miang Orang rumah bukai ke bisi penusah tang kitai serumah ke enggau kiruh
Pandak mulut engkerasak, panjai mulut kitai Orang ke deka bendar betenah tauka bejai orang bukai
Pemangka Gandong Perahu Endor ngelepas ka penyalah
Rusa di kaki tangga enda diemparu, kunchit di tisi langit deka ditunu.   Utai ke semak udah temu ulih enda diambi tang utai ke jauh sereta bedau temu ulih tauka enda deka digiga
Ragak riang, enti dipansuh enda bulih seputung munti Balat seregah tang penemu ke dikembuan enda tetipakka sereg
Remaung di rumah, raung di tanah Di rumah kering, regas tang enti gawa di tanah nadai tapi
Runggu ensing enti terebai apus ga sungai Gamal dipeda lembau tang enti iya ngereja pengawa tembu enggau manah
Raung ke beketebung pama bengkak jari, tichak ke beranak engkarung beadi-adi. Orang ke ngereja pengawa tang kitai ke napi pemedis enggau pengiriuh
Rarika rebut tetemuka ujan, rarika sungkup tetemukan pendam Nadai ulih nyeliahka diri ari besatup enggau penusah
Rari kulu tama buba, rari kili tama ensenga Penusah nadai ulih diseliahka, kin kia dituntung penusah
Rari ke ribut tetemu ke ujan, rari ke sungkup tetemu ke pendam nya utai ti di kenggai, nya ga utai ti datai(nyadi)
Sapa ke makai chabi nya meh berasai pedas Orang ke ngereja penyalah nya meh ngasaika penyalah diri
Sumpah empitu enggau chuik. Sebarang sapa ke dulu ngelanggar danji iya nya meh dulu kena tinggang penusah.
Turun mata benih Dua iku lelaki diri menyadi jadi enggau dua iku indu diri menyadi ari sepiak mega.
Telan sawa enda terpanggai, tangkap kamba nadai endor mulai Orang ke bisi berasai malu nerima tolong ari orang leboh iya bisi penusah laban iya ingat ka diri empu jarang serta enda kala meri tolong ngagai orang bukai.  
Tuai Pala Upa disema ke kitai ngaggai siku-suku tuai ke kelalu lembut tauka nadai penamu serta enda patut mangku pengawa tuai
Untung bulih beliung enda ngambuh, mudah bulih peredah enda ningkuh Bulih utai tang nadai pengiruh tauka pemedis ngulihka iya. Bulih utai enggau mudah
Untung sekarung rugi seguni Amu deka bulih untung mayuh tang tulihka pengerugi
Ukai ngajihka rangkang ngachuk mata Ukai dekaka penusah nuntung sapa-sapa
Udah labuh dipanggung lesung Beturut-turut ditinggang penusah  
Udah aruk dipukung alung Udah ga jai gamal tambah enggau penyai ulah
Facebook Comments

Leave a Reply

Your email address will not be published. Required fields are marked *