Anak Iban

Palan Bebagi Mayuh Macham Penemu

Reti Pengawa ‘Ngamang’ Ba Pengidup Iban

Artikel tu diambi ari Datuk Dr Anthony Nait ti dikeluarka http://www.theborneopost.com kena 03/06/2012

 

Nama pengawa ‘ngamang’? Kala kita ninga pengawa ke bakatu tauka bisi enda pengawa tu digaga di menua kita?

 

Enti bisi manah ga, tang enti nadai, aram kitai sama bekunsi ke penemu ba pengawa ngamang tu, ngambika kitai sama-sama nambahka penemu sereta ngelala reti pengawa ti bisi digaga ba sesebengkah rumah panjai kitai Iban di menua Sarawak ditu.

 

Pengawa ke dikumbai orang ‘ngamang’ tu, iya ke bendar nya ukai sebengkah ari adat asal kitai Iban. Reti nya pengawa ‘ngamang’ tu ukai adat ba penemu aku, iya tu siti ari pengarap ti agi mengkang dipegai sekeda bansa kitai Iban, lebih agi sida ti diau ba rumah-rumah panjai ke agi ngembuan pengarap lama.

 

Nambah ke nya mega, pengawa ‘ngamang’ tu jarang bendar didinga kitai mayuh.

Sema enti bisi pan, nadai mayuh orang ke nemu pengawa sereta reti enggau tuju ‘ngamang’ tu.

 

Aram kitai nemuai enda lama ngagai sebengkah rumah panjai di Stumbin dalam bagi menua Sri Aman iya nya dipegai Tuai Rumah (TR) Suyong, lalu nuku sereta ngelala pengawa ‘ngamang’ tu ke bisi diatur ba rumah panjai sida lebuh ke ngintu pengerami Hari Gawai kena 1 Jun tu tadi.

 

Pengawa ‘ngamang’ tu deka diatur tauka diintu sebedau tauka apin anak lelaki, iya ke tuai aja, deka betutus.

 

Nyadi anak lelaki bukai ke nangkan ke iya, reti nya lumor dua, tiga nyentuka pengabis biak nadai agi kena serangkung pengarap tu.

 

Kebuah pia, laban pemali tauka penusah lebuh maya betutus ke bisi (tauka sema bisi) nyadi ba madi lelaki iya ke biak, udah ditebus ba pengawa ‘ngamang’ ba madi sida ke tuai nya tadi.

 

Nyadi tuju ti bendar pengarap ba pengawa ngamang tu, iya nya ngambika lebuh maya anak lelaki kitai betutus, semua pengawa lebuh maya betutus bejalai enggau manah sereta mujur lalu nadai utai ti jai deka nyadi.

 

Utai ti jai ditu nya baka bedarah enggai badu-badu lalu ngujung ke nembiak ti ditutus nya tadi nyau mabuk darah. Pia mega enggai ka ‘utai’nembiak nya mega tau muruk, kembai lama lalu enggai badu tauka enggai gerai.

 

Lalu pekara ti bakatu suah endar tauka ulih nyadi ba maya aki ini kitai dulu kelia.

 

Nya alai bejarit ari pekara tu ti kala nyadi lalu dikena nyeliah ke utai ke bansa tu, dia pengawa ‘ngamang’ tu bisi diatur. Lalu bansa kitai Iban ti agi megai pengarap lama ba siti-siti sitak menua, agi ngasi ke pengawa tu.

 

Kemaya pengawa ‘ngamang’ tu tau digaga tauka diintu? Pengawa ‘ngamang’ tu tau diintu lebuh barang maya lalu nadai penti pemali ku jaku kitai ke diatu. Kitai tau ngintu iya maya kitai bisi pengelantang.

 

Kebuah pia, pengawa ‘ngamang’ tu tau dikumbai kitai pengawa mit iya besai ga tang enti dikumbai kitai pengawa besai iya enda ga kelalu besai.

 

Kebuah pia, laban iya ulih ‘betulak ansur’.

 

Reti nya, enti kitai ngumbai pengawa ‘ngamang’ tu mit, iya enda ga mit, laban orang ti diasuh kitai ngamang nya enti ulih ukai orang sengapa, iya patut orang ti ‘bepemisi’ sereta lantang ba pengidup.

 

Ba iya, orang ti seruran diasuh ba pengawa tu, enti ulih kaban belayan kitai empu. Nemu kita, orang ti diasuh ngereja pengawa ‘ngamang’ tu meh ti mansutka semua belanja kena ngintu pengawa tu. Orang ke ‘ngamang’ nya mansutka piring enggau babi laban darah dikena enselan, semua perengka ke diguna baka ai tuak, ai oren, ai bisa, penganan, beras, tabak enggau mayuh perengka ke bukai diguna. Nya alai, kati ku kitai ngumbai pengawa tu mit?. Lalu pia mega, aku tadi bisi nyebut jaku ‘betulak ansur’.

 

Reti nya, ba pengawa ‘ngamang’ tu kitai mesti begunaka darah babi kena enselan.

 

Nyadi pengawa tu, tau nyadi mit enti kitai ngintu pengawa ‘ngamangn tu nyerumba orang ke bisi gawa ke tanju (sandau hari).

 

Kitai enda ibuh munuh babi laban kitai tau ngena darah babi orang ke gawa nya. Kitai mega tau bekunsi ba pengawa orang, kitai patut ga nemu, anang ga kelalu ngenyadi, mai ga utai munga mimit kena nulung orang.

 

Baka ni ngintu pengawa ‘ngamang’ tu?. Nyadi, sebedau kitai miring sereta ngatur pengawa ‘ngamang’, baka nembiak lelaki ti deka ditutus nya tadi, iya deka dima ba belakang lalu betabuh mai iya bejalai bepusin tiga kali di ruai rumah panjai ari puting setak ngagai puting setak. Sida ke ngiring iya tu tak naka pemayuh meh sapa ka enggau bejalai ngelingi rumah panjai.

 

Udah tiga kali pusin, orang ti diasuh ‘ngamang’ tu tadi lalu miring, udah nya, nembiak ke deka diamang tu duduk tisi piring lalu dibab tauka diserangkung enggau pua kumbu.

 

Udah nya, iya deka dibai orang ke dipadu ngintu pengawa ‘ngamang’ nya. Nyadi… udah tembu bebiau sereta besampi dia tuai ti deka ngamang nya, ngelindung nembiak laki nya enggau pua kumbu (enggaika dipeda orang).

Dia orang ti deka ngamang nya nyilakka tanchut anak nya lalu ngambi lunga. Nyadi ba senario tu, lebuh iya nyilak tauka muka tanchut nembiak lelaki nya, dia orang ti diasuh ngereja pengawa tu, besampi lalu ‘ngamang’ aja ngelulu baka ke deka nutus ba ‘utai’ nembiak lelaki nya. Nyadi, orang ti ngamang lalu besampi nya enda lama aja, munyi ku jaku kitai, anang enda aja ngamang.

 

Ba penemu aku, pengarap tauka pengawa baka tu sigi manah laban tu siti ari pengarap kitai ti ditinggalka bala aki enggau ini ti udah lama ninggal ngejangka kitai.

 

Nyadi, pengawa baka tu tau nyadika reta ba penemu kitai. Amat meh pengawa nya ti nyamai gaya dipeda tang pengawa nya mayuh ga. Nyadi utai ke bendar lalu beguna amat ba pengarap tu, iya nya ‘reti pengawa’.

 

Aku ke mansutka cherita pengawa ‘ngamang’ tu, laban deka mai kitai bansa Iban berundingka mayuh macham pengarap ti dikembuan kitai bansa Iban ba sitak menua siti penyelai pengawa bansa kitai sereta pia mega arapka kitai tau bekunsi, bebagi penemu awakka bansa kitai nemu pengawa bala kitai Iban ti diau ba rumah panjai menua bukai.

 

Lalu pia mega, pengawa ‘ngamang’ tu siti ari pengawa ti tau ngenatai sereta mai penusah ngagai bala nembiak ti deka betutus.

 

Bala pemacha, ukai semina pengawa ‘ngamang’ tu kitai patut ngampun dulu, baka pengawa bukai mega, kitai di rumah panjai deka ngampun, ambika chunto, enti bisi burung tauka jelu masuk rumah, kitai patut ngaduka pengawa ngampun dulu enggaika rumah panjai ‘angat’.

 

Angat reti nya, kitai ke diau ba rumah panjai enda bepengerai, seruran sakit sereta ti tau ngujungka mai nyawa mayuh bala ti diau ba dia.

Nyadi gambar pengawa ‘ngamang’ tu, diambi bini aku SAO Datin Laceylona di Rumah Suyong, Stumbin, Sri Aman lebuh maya ngintu Hari Gawai tu tadi sereta dikarang aku empu, Datuk Dr Anthony Nait – “Kitai Idup Betungkatka Adat, Kitai Bejalai Bepayungka Pengarap”.

Facebook Comments

Related Post

Leave a Reply

Your email address will not be published. Required fields are marked *

Anak Iban © 2017 Frontier Theme