Anak Iban

Palan Bebagi Mayuh Macham Penemu

Tesau Pekit Pidato Iban UB-Aedil 2017

Tabi basa nuju semua..

Semua raban nembiak lebih agi bansa Dayak diperansang ngambi bagi ba pekit tu dikena mandangka pengangkun ke Jaku Iban

 

Chairman Serakup Dayak Iban Sarawak (Sadia) Pampang Kuching, Datuk Paduka Anthony Nait Mani madahka raban nembiak ti landik bejaku Iban patut datai enggau penuh pengandal mantaika penau diri ba Pekit Pidato Iban UB-Aedil kena 5 Ogos 2017, ditu.

 

“Aku ngarapka raban nembiak Dayak, kelebih agi Iban anang berasai nangi tang mansang ke mua naka ulih nguji enggau penuh pengandal. Taja pia, suah agi matih diri sebedau bepekit. Enti ulih, latih diri ba mua bala bakih enggau diri sebilik dulu lalu minta sida meri penemu ti meruan nyadi sebagi ari program belajar,” ku Nait.

 

Sadia Kuching, ku iya endang nyukung 100 peratus pengawa ngatur pekit pidato Iban renggat nengeri ti keterubah tu.

 

“Nyadi pekit keterubah ke bansa tu, enda patut tinggal kelebih agi Dayak. Tambah mega iya nyediaka perais mata duit ti manah sereta nyediaka awak ngagai bala pemenang dikena nambahka penyereta ba resume diri empu,” ku iya.

 

Nait madahka semua serakup tauka gempung ukai dikuasa perintah (NGO) Dayak patut meri sukung ngagai piak pengatur Pekit Pidato Iban UB-Aedil (Utusan Borneo-Gerempung Pemansang Pelajar Jaku Iban) ti nyediaka pelasar ngagai raban nembiak mantaika pengelandik tauka penau sida bejaku.

 

“Semua kitai meseti nyukung. Nyema Dayak enda nyukung bansa diri, sapa agi deka nyukung? Jaku kitai tu nyadi kelai penatai kitai ke mandangka iya besai reti enggau basa…reti nya nyema kitai enda angkun ngagai jaku diri, nadai orang deka bebasaka kitai.

 

“Nya kebuah kelebih agi kitai Iban, meseti temegah enggau jaku diri. Enda chukup enti kitai enda landik bejaku Iban. Reti iya, kitai meseti landik bejaku enggau sebut ti betul sereta berurun. Nyadi Sadia Kuching nyukung penuh projek UB-Aedil,” ku Nait madah enggau nyemetak.

 

Ba lansa bukai, piak komiti pengatur Pidato Iban Ub-Aedil madahka sida deka nambahka seiti agi kategori ngagai dua kategori ke dulu iya nya Kategori Nembiak Sekula Sekondari enggau Kategori Universiti/Kolej/IPG.

 

Nitih ku Sekretari Pengatur Pekit, Mathias Kassap, belalauka jaku sekeda kaban kunsil nengeri (ADUN), sida deka ngadaka kategori ketiga – Tebuka Baruh Umur 45 taun enggau tuju ke nangkup peminta raban nembiak ke bukai.

 

Renggat kepenudi Pekit Pidato Iban UB-Aedil ditetapka kena 5 Ogos 2017. Melabaka deka bisi mayuh penyereta, piak pengatur nyangka deka milih sekeda pesereta kepenudi ba renggat tumu ke deka diatur kena 4 Ogos. Palan ngatur pekit diperambu ba Palan Pematih Pengajar (IPG) Batu Lintang ditu.

 

Sapit Kepala Menteri Sarawak Tan Sri Dr James Jemut Masing, ke mega Menteri Pemansang Infrastruktur enggau Pengangkut, udah setuju nyadi patron sereta temuai dipebasa ngulu pekit kepenudi kena 5 Ogos.

 

Pekit tu tebuka ngagai semua bansa. Penerang silik tau betelefon nuju Churchill Edward ba lumur 017-8081485, Isa Lee (013-8266081) enggau Matthias Kassap (016-8726064).

 

Post tu diambi ari berita http://www.utusanborneo.com.my/

Facebook Comments

Related Post

Leave a Reply

Your email address will not be published. Required fields are marked *

Anak Iban © 2017 Frontier Theme